ਹੁਸ਼ਿਆਰਪੁਰ (ਦ ਸਟੈਲਰ ਨਿਊਜ਼)। ਦੇਸ਼ ਭਰ ਦੇ ਕਿਸਾਨੀ ਸੰਘਰਸ਼ ਵਿਚ ਸ਼ਹੀਦ ਅਤੇ ਜ਼ਖ਼ਮੀ ਹੋਏ ਪਰਿਵਾਰਾਂ ਦੀ ਭਵਿੱਖ ਵਿੱਚ ਬਾਂਹ ਫੜਨ ਦਾ ਸਮਾਂ ਹੁਣ ਸ਼ੁਰੂ ਹੋ ਗਿਆ ਹੈ ਕਿਉਂਕਿ ਸੰਯੁਕਤ ਕਿਸਾਨ ਮੋਰਚੇ ਨੂੰ ਜੋ ਵੀ ਸਫ਼ਲਤਾ ਮਿਲੀ ਹੈ ਉਸ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਉਨ੍ਹਾਂ ਪਰਿਵਾਰਾਂ ਦਾ ਹੈ ਜਿਨ੍ਹਾਂ ਨੇ ਆਪਣੇ ਪਰਿਵਾਰਕ ਮੈਂਬਰ ਇਸ ਸੰਘਰਸ਼ ਵਿੱਚ ਸ਼ਹੀਦ ਕਰਵਾ ਲਏ ਅਤੇ ਜ਼ਖ਼ਮੀ ਹੋਏ ਹਨ । ਇਹ ਵਿਚਾਰ ਐਡਵੋਕੇਟ ਇੰਦਰਪਾਲ ਸਿੰਘ ਧੰਨਾ ਸਾਬਕਾ ਵਾਈਸ ਚੇਅਰਮੈਨ ਬਾਰ ਕੌਂਸਲ ਪੰਜਾਬ ਹਰਿਅਾਣਾ ਅਤੇ ਚੰਡੀਗਡ਼੍ਹ ਹਾਈਕੋਰਟ ਨੇ ਪ੍ਰੈੱਸ ਨਾਲ ਸਾਂਝੇ ਕੀਤੇ। ਉਨ੍ਹਾਂ ਕਿਹਾ ਕਿ ਦੇਸ਼ ਭਰ ਦੇ ਕਿਸਾਨਾਂ ਦੁਆਰਾ ਸ਼ੁਰੂ ਕੀਤੇ ਤਿੰਨ ਕਾਲੇ ਕਾਨੂੰਨਾਂ ਨੂੰ ਰੱਦ ਕਰਨ ਦਾ ਸੰਘਰਸ਼ ਇਤਿਹਾਸਕ ਹੋ ਨਿੱਬੜਿਆ ਹੈ ਅਤੇ ਸ਼ਾਂਤਮਈ ਢੰਗ ਨਾਲ ਕ੍ਰਾਂਤੀਕਾਰੀ ਵਿਖਾਵੇ ਆਪਣੇ ਆਪ ਵਿੱਚ ਮਿਸਾਲ ਹੋ ਨਿਬੜੇ ਹਨ । ਹੁਣ ਕਿਸਾਨੀ ਜਥੇਬੰਦੀਆਂ ਉੱਪਰ ਭਵਿੱਖ ਵਿਚ ਆਪਣੇ ਵੱਕਾਰ ਨੂੰ ਨਿਰੰਤਰ ਬਹਾਲ ਰੱਖਣਾ ਅਤਿ ਜ਼ਰੂਰੀ ਹੈ ਅਤੇ ਸ਼ਾਂਤਮਈ ਢੰਗ ਨਾਲ ਵਿਚਰਨਾ ਉਸ ਨਾਲੋਂ ਵੀ ਅਤਿ ਜ਼ਰੂਰੀ ਹੋ ਗਿਆ ਹੈ ।
ਕਿਸਾਨੀ ਸੰਘਰਸ਼ ਦੇ ਸਫ਼ਲ ਹੋਣ ਤੋਂ ਬਾਅਦ ਹਰੇਕ ਸਿਆਸੀ ਧਿਰ ਇਸ ਦੀ ਸਫ਼ਲਤਾ ਤੋਂ ਲਾਭ ਲੈਣ ਲਈ ਹਰੇਕ ਤਰ੍ਹਾਂ ਦਾ ਹੱਥਕੰਡਾ ਵਰਤੇਗੀ ਪਰ ਕਿਸਾਨ ਜਥੇਬੰਦੀਆਂ ਜਿਥੇ ਅਜਿਹੇ ਹਥਕੰਡੇ ਤੋਂ ਸੁਚੇਤ ਰਹਿਣ ਗੀਆਂ ਉੱਥੇ ਆਪਣੀ ਭਵਿੱਖ ਦੀ ਯੋਜਨਾਬੰਦੀ ਨੂੰ ਵੀ ਬਹੁਤ ਸੂਝਬੂਝ ਨਾਲ ਤਿਆਰ ਕਰਨਗੀਆਂ ਤਾਂ ਜੋ ਕਿਸਾਨੀ ਆਗੂ ਆਪਣੇ ਦੂਸਰੇ ਸਫ਼ਲਤਾ ਦੇ ਪੜਾਅ ਵਿੱਚ ਵੀ ਸਫ਼ਲ ਹੋ ਕੇ ਨਿਕਲਣ । ਉਨ੍ਹਾਂ ਕਿਹਾ ਕਿ ਦੇਸ਼ ਵਿਦੇਸ਼ ਵਿੱਚ ਬੈਠੇ ਕਿਸਾਨੀ ਨਾਲ ਸਬੰਧਤ ਭਾਰਤੀ ਅਤੇ ਖਾਸ ਤੌਰ ਤੇ ਪੰਜਾਬੀ ਇਸ ਸਫਲਤਾ ਲਈ ਅੱਜ ਵਧਾਈ ਦੇ ਪਾਤਰ ਹਨ । ਇਸ ਮੌਕੇ ਐਡਵੋਕੇਟ ਪ੍ਰਦੀਪ ਗੁਲੇਰੀਆ, ਐਡਵੋਕੇਟ ਰਮਨ ਮਹਿਤਾ, ਐਡਵੋਕੇਟ ਸਤੀਸ਼ ਰਿਆਤ, ਐਡਵੋਕੇਟ ਵਰੁਣ ਸ਼ਰਮਾ, ਐਡਵੋਕੇਟ ਮਨੀਸ਼ ਪਟਿਆਲ, ਐਡਵੋਕੇਟ ਰਿਪੂ ਠਾਕਰ, ਐਡਵੋਕੇਟ ਈਸ਼ਾਨ ਕੌਸ਼ਲ ਹਾਜ਼ਰ ਸਨ।