ਕਪੂਰਥਲਾ(ਦ ਸਟੈਲਰ ਨਿਊਜ਼), ਰਿਪੋਰਟ-ਗੌਰਵ ਮੜੀਆ। ਵੈਲੇਨਟਾਈਨ ਡੇਅ ਮੌਕੇ ਤੇ ਬੁੱਧਵਾਰ ਨੂੰ ਵਿਰਾਸਤੀ ਸ਼ਹਿਰ ਵਿੱਚ ਸ਼ਿਵ ਸੈਨਾ ਬਾਲਾ ਸਾਹਿਬ ਠਾਕਰੇ ਸ਼ਿੰਦੇ ਗਰੁੱਪ ਦੇ ਵਰਕਰਾਂ ਨੇ ਯੂਥ ਵਿੰਗ ਦੇ ਜ਼ਿਲ੍ਹਾ ਪ੍ਰਧਾਨ ਸਪਤ ਅਲੀ, ਸ਼ਹਿਰੀ ਪ੍ਰਧਾਨ ਰਘੁਵੀਰ, ਸਕੱਤਰ ਪਰਵੀਨ ਕੁਮਾਰ, ਸ਼ਿਵ ਸੈਨਾ ਦੇ ਆਗੂ ਨੀਰਜ ਸ਼ਰਮਾ ਦੀ ਅਗਵਾਈ ਹੇਠ ਇਹ ਦਿਨ ਨੂੰ ਪਿਆਰ ਦਿਵਸ ਵਜੋਂ ਮਨਾਉਣ ਦਾ ਸਖ਼ਤ ਵਿਰੋਧ ਕੀਤਾ। ਸ਼ਿਵ ਸੈਨਾ ਸ਼ਿੰਦੇ ਦੇ ਕਈ ਵਰਕਰਾਂ ਨੇ ਸ਼ਹਿਰ ਦੇ ਮਨੀਮਹੇਸ਼ ਮੰਦਿਰ ਵਿਖੇ ਪੁਲਵਾਮਾ ਦੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ ਅਤੇ ਉਨ੍ਹਾਂ ਦੀ ਸ਼ਹਾਦਤ ਨੂੰ ਪ੍ਰਣਾਮ ਕੀਤਾ। ਇਸ ਤੋਂ ਬਾਅਦ ਸ਼ਿਵ ਸੈਨਿਕਾਂ ਨੇ ਮਾਲ ਰੋਡ ਤੇ ਇਸ ਦਿਨ ਨੂੰ ਲੈ ਕੇ ਵਿਰੋਧ ਪ੍ਰਦਰਸ਼ਨ ਕੀਤਾ।ਮਾਲ ਰੋਡ ਤੇ ਸ਼ਿਵ ਸੈਨਿਕਾਂ ਨੇ ਵੈਲੇਨਟਾਈਨ ਡੇਅ ਦੇ ਕਾਰਡ ਸਾੜੇ।ਇਸ ਤੋਂ ਬਾਅਦ ਪਿਆਰ ਦੇ ਪ੍ਰਤੀਕ ਜਿਵੇਂ ਗੁਲਾਬ, ਗ੍ਰੀਟਿੰਗ ਕਾਰਡ ਅਤੇ ਚਾਕਲੇਟ ਆਦਿ ਨੂੰ ਅੱਗ ਲਗਾ ਦਿੱਤੀ। ਵਿਰੋਧ ਪ੍ਰਦਰਸ਼ਨ ਦੌਰਾਨ ਸ਼ਿਵ ਸੈਨਾ ਦੇ ਵਰਕਰ ਲਗਾਤਾਰ ਜੈ ਸ਼੍ਰੀ ਰਾਮ, ਪੁਲਵਾਮਾ ਦੇ ਸ਼ਹੀਦ ਅਮਰ ਰਹਿਣ ਦੇ ਨਾਅਰੇ ਲਗਾ ਰਹੇ ਸਨ ਅਤੇ ਕਹਿ ਰਹੇ ਸਨ ਕਿ ਇਸ ਦਿਨ ਨੂੰ ਲੜਕੇ ਲੜਕੀਆਂ ਨੂੰ ਛੇੜਨ ਲਈ ਇਸਤੇਮਾਲ ਕਰਦੇ ਹਨ।
ਇਸ ਮੌਕੇ ਸ਼ਿਵ ਸੈਨਾ ਦੇ ਸ਼ਿੰਦੇ ਗਰੁੱਪ ਦੇ ਜ਼ਿਲ੍ਹਾ ਪ੍ਰਧਾਨ ਮੁਕੇਸ਼ ਕਸ਼ਯਪ ਨੇ ਕੇਂਦਰ ਸਰਕਾਰ ਦੇ ਨਾਲ-ਨਾਲ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਅਗਲੇ ਸਾਲ ਤੋਂ ਵੈਲੇਨਟਾਈਨ ਡੇਅ ਮਨਾਉਣ ਤੇ ਪੂਰੇ ਤਰੀਕੇ ਨਾਲ ਪਾਬੰਦੀ ਲਗਾਈ ਜਾਵੇ। ਸ਼ਿਵ ਸੈਨਿਕਾਂ ਦਾ ਕਹਿਣਾ ਸੀ ਕਿ ਵੈਲੇਨਟਾਈਨ ਡੇਅ ਭਾਰਤੀ ਸੰਸਕ੍ਰਿਤੀ ਦੇ ਖਿਲਾਫ ਹੈ। ਉਨ੍ਹਾਂ ਕਿਹਾ ਕਿ ਆਮ ਤੌਰ ਤੇ 14 ਫਰਵਰੀ ਤੋਂ ਬਾਅਦ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਔਰਤਾਂ ਅਤੇ ਲੜਕੀਆਂ ਤੇ ਤੇਜ਼ਾਬ ਹਮਲਿਆਂ ਅਤੇ ਜਾਨਲੇਵਾ ਹਮਲਿਆਂ ਦੇ ਮਾਮਲੇ ਸਾਹਮਣੇ ਆਉਂਦੇ ਹਨ ਅਤੇ ਇਸੇ ਕਾਰਨ ਉਹ ਇਸ ਦਿਨ ਨੂੰ ਮਨਾਉਣ ਦਾ ਵਿਰੋਧ ਕਰ ਰਹੇ ਹਨ। ਇਸ ਦੌਰਾਨ ਮੁਕੇਸ਼ ਕਸ਼ਯਪ ਨੇ ਨੌਜਵਾਨਾਂ ਨੂੰ ਕਿਹਾ ਕਿ ਉਹ ਪੱਛਮੀ ਸੱਭਿਆਚਾਰ ਦੇ ਭੁਲੇਖੇ ਵਿੱਚ ਨਾ ਆਉਣ। ਇਹ ਬਹੁਕੌਮੀ ਕੰਪਨੀਆਂ ਦੀ ਸਾਜਿਸ਼ ਹੈ। ਅਸੀਂ ਸਨਾਤਨ ਸੰਸਕ੍ਰਿਤੀ ਦੇ ਧਾਰਨੀ ਹਾਂ। ਉਨ੍ਹਾਂ ਕਿਹਾ ਕਿ ਸਾਡੇ ਸੱਭਿਆਚਾਰ ਵਿੱਚ ਪਿਆਰ ਦੀ ਭਾਵਨਾ ਨੂੰ ਦਰਸਾਉਣ ਲਈ ਕਈ ਦਿਨ ਪਹਿਲਾਂ ਤੋਂ ਮੌਜੂਦ ਹਨ।ਵੈਲੇਨਟਾਈਨ ਡੇਅ ਦੇਸ਼ ਦੀ ਸੰਸਕ੍ਰਿਤੀ ਨੂੰ ਤਬਾਹ ਕਰਨ ਦਾ ਇੱਕ ਦੁਸ਼ਟ ਚੱਕਰ ਹੈ। ਇਸ ਮੌਕੇ ਮੁਕੇਸ਼ ਕਸ਼ਯਪ ਨੇ ਪੁਲਵਾਮਾ ਹਮਲੇ ਵਿੱਚ ਸ਼ਹੀਦ ਹੋਏ ਜਵਾਨਾਂ ਨੂੰ ਸ਼ਰਧਾਂਜਲੀ ਦਿੰਦੇ ਹੋਏ ਕਿਹਾ ਕਿ ਪੁਲਵਾਮਾ ਦੇ ਕਾਇਰਾਨਾ ਅੱਤਵਾਦੀ ਹਮਲੇ ਵਿੱਚ ਆਪਣੀ ਮਹਾਨ ਕੁਰਬਾਨੀ ਦੇ ਕੇ ਦੇਸ਼ ਦੀ ਪ੍ਰਭੂਸੱਤਾ ਨੂੰ ਬਰਕਰਾਰ ਰੱਖਣ ਵਾਲੇ ਸੀਆਰਪੀਐਫ ਦੇ ਬਹਾਦਰ ਜਵਾਨਾਂ ਨੂੰ ਦਿਲੋਂ ਸ਼ਰਧਾਂਜਲੀ ਭੇਟ ਕਰਦਾ ਹਾਂ।ਦੇਸ਼ ਤੁਹਾਡੀ ਕੁਰਬਾਨੀ ਦਾ ਹਮੇਸ਼ਾ ਰਿਣੀ ਰਹੇਗਾ। ਤੁਹਾਡੀ ਬਹਾਦਰੀ ਸਾਨੂੰ ਅੱਤਵਾਦ ਨੂੰ ਜੜ੍ਹੋਂ ਪੁੱਟਣ ਲਈ ਲਗਾਤਾਰ ਪ੍ਰੇਰਿਤ ਕਰਦੀ ਰਹੇਗੀ। ਉਨ੍ਹਾਂ ਕਿਹਾ ਕਿ ਦੇਸ਼ ਵਾਸੀਆਂ ਨੂੰ ਅੱਜ ਦਾ ਦਿਨ ਹਮੇਸ਼ਾ ਯਾਦ ਰਹੇਗਾ। ਇਸ ਹਮਲੇ ਨੂੰ ਦੇਸ਼ ਵਾਸੀ ਕਦੇ ਨਹੀਂ ਭੁੱਲਣਗੇ। ਦੇਸ਼ ਦੀ ਫੌਜ ਨੇ ਇਸ ਹਮਲੇ ਦਾ ਬਦਲਾ ਪਾਕਿਸਤਾਨ ਚ ਦਾਖਲ ਹੋ ਕੇ ਅੱਤਵਾਦੀਆਂ ਤੇ ਹਵਾਈ ਹਮਲਾ ਕਰਕੇ ਲਿਆ ਸੀ। ਇਸ ਮੌਕੇ ਅਕਾਸ਼ ਕੁਮਾਰ, ਸਮੀਰ ਕੁਮਾਰ, ਗਗਨ, ਤਰੁਣ, ਅਭਿਸ਼ੇਕ, ਨੀਰਜ, ਕਰਨਦੀਪ ਸਿੰਘ, ਪ੍ਰੇਮ, ਸ਼ੰਕਰ, ਸਲੀਮ ਖਾਨ, ਰਾਜਵੀਰ ਰਾਜਾ,ਰੇਹਾਨ ਅਲੀ, ਗੁਲਜ਼ਾਰ ਬਿੱਲੂ, ਰਵੀ ਆਦਿ ਹਾਜ਼ਰ ਸਨ।
