ਜਲੰਧਰ (ਦ ਸਟੈਲਰ ਨਿਊਜ਼)। ਰਿਪੋਰਟ: ਅਭਿਸ਼ੇਕ ਕੁਮਾਰ। ਜੇਕਰ ਤੁਹਾਨੂੰ ਪੁੱਛਿਆ ਜਾਵੇ ਕਿ ਸਾਲ 2021 ਵਿੱਚ ਜਲੰਧਰ ਲਈ ਸਭ ਤੋਂ ਮਾਣ ਵਾਲਾ ਪਲ ਕਿਹੜਾ ਸੀ, ਤਾਂ ਸਾਰੇ ਇੱਕ ਹੀ ਆਵਾਜ ਵਿੱਚ ਕਹਿ ਸਕਦੇ ਹਨ ਕਿ ਜਦੋਂ ਹਾਕੀ ਕਪਤਾਨ ਮਨਪ੍ਰੀਤ ਆਪਣੇ ਸਾਥੀਆਂ ਸਮੇਤ ਟੋਕੀਓ ਤੋਂ ਕਾਂਸੇ ਦਾ ਤਗਮਾ ਜਿੱਤ ਕੇ ਜਲੰਧਰ ਪਰਤਿਆ ਸੀ। 41 ਸਾਲਾਂ ਦੇ ਲੰਬੇ ਇੰਤਜਾਰ ਤੋਂ ਬਾਅਦ ਭਾਰਤ ਨੇ ਇੱਕ ਵਾਰ ਫਿਰ ਓਲੰਪਿਕ ਵਿੱਚ ਤਮਗਾ ਜਿੱਤ ਕੇ ਹਾਕੀ ਦੇ ਮੈਦਾਨ ਵਿੱਚ ਆਪਣਾ ਦਬਦਬਾ ਦਿਖਾਇਆ। ਟੋਕੀਓ ਵਿੱਚ ਜਿੱਤਣ ਵਾਲੀ ਭਾਰਤੀ ਹਾਕੀ ਟੀਮ ਦੇ ਕਪਤਾਨ ਮਨਪ੍ਰੀਤ ਸਿੰਘ ਸਮੇਤ ਕੁੱਲ ਚਾਰ ਖਿਡਾਰੀ ਜਲੰਧਰ ਦੇ ਸਨ।
ਇਸ ਸਾਲ ਅਗਸਤ ਵਿੱਚ ਜਦੋਂ ਕੈਪਟਨ ਮਨਪ੍ਰੀਤ ਸਿੰਘ, ਮਨਦੀਪ ਸਿੰਘ, ਵਰੁਣ ਕੁਮਾਰ ਅਤੇ ਹਾਰਦਿਕ ਸਿੰਘ ਹਾਕੀ ਵਿੱਚ ਕਾਂਸੇ ਦਾ ਤਗਮਾ ਜਿੱਤ ਕੇ ਜਲੰਧਰ ਪਰਤੇ ਤਾਂ ਖੇਡ ਪ੍ਰੇਮੀਆਂ ਵੱਲੋਂ ਉਨ੍ਹਾਂ ਦਾ ਸਾਨਦਾਰ ਸਵਾਗਤ ਕੀਤਾ ਗਿਆ। ਹਾਕੀ ਪ੍ਰੇਮੀਆਂ ਨੇ ਢੋਲ ਦੀ ਧੁਨ ‘ਤੇ ਜਸ਼ਨ ਮਨਾਇਆ। ਮਨਦੀਪ ਸਿੰਘ, ਮਨਪ੍ਰੀਤ ਸਿੰਘ, ਵਰੁਣ ਅਤੇ ਹਾਰਦਿਕ ਦਾ ਸਵਾਗਤ ਕਰਨ ਲਈ ਲੋਕ ਸਵੇਰ ਤੋਂ ਹੀ ਸੜਕਾਂ ‘ਤੇ ਖੜ੍ਹੇ ਨਜਰ ਆਏ ਸਨ। ਉਨ੍ਹਾਂ ਦਾ ਪੰਜਾਬ ਆਰਮਡ ਪੁਲਿਸ (ਪੀਏਪੀ) ਕੰਪਲੈਕਸ ਵਿਖੇ ਸੀਨੀਅਰ ਪੁਲਿਸ ਅਧਿਕਾਰੀਆਂ ਨੇ ਸਵਾਗਤ ਕੀਤਾ। ਬਾਅਦ ਵਿੱਚ ਖਿਡਾਰੀ ਫੁੱਲਾਂ ਨਾਲ ਸਜੀ ਕਾਰ ਵਿੱਚ ਸਵਾਰ ਹੋ ਕੇ ਮਿੱਠਾਪੁਰ ਲਈ ਰਵਾਨਾ ਹੋਏ।
