ਝਾਰਖੰਡ (ਦ ਸਟੈਲਰ ਨਿਊਜ਼)। ਝਾਰਖੰਡ ਦੇ ਰਾਮਗੜ੍ਹ ਜ਼ਿਲ੍ਹੇ ਤੇ ਪਤਰਾਤੂ ਤੋਂ ਮੁੱਠਭੇੜ ਦੀ ਖਬਰ ਆ ਰਹੀ ਹੈ। ਅਮਨ ਸਾਵ ਗਰੋਹ ਦੇ ਅਪਰਾਧੀਆਂ ਨੂੰ ਫੜਨ ਲਈ ਪਹੁੰਚੇ ਏਟੀਐਸ ਰਾਂਚੀ ਦੇ ਡੀਐਸਪੀ ਨੀਰਜ ਕੁਮਾਰ ਅਤੇ ਰਾਮਗੜ੍ਹ ਜ਼ਿਲ੍ਹੇ ਦੇ ਐਸਆਈ ਸੋਨੂੰ ਕੁਮਾਰ ਉੱਤੇ ਗੋਲੀਆਂ ਚਲਾ ਦਿੱਤੀਆਂ। ਇਸ ਗੋਲੀਬਾਰੀ ਵਿੱਚ ਦੋਵੇ ਜ਼ਖ਼ਮੀ ਹੋ ਗਏ। ਇਹ ਘਟਨਾ ਪਤਰਾਤੂ ਥਾਣਾ ਖੇਤਰ ਦੇ ਡਾਢੀ ਦੀਡ ਦੇ ਸਰਨਾ ਸਕੂਲ ਦੇ ਕੋਲ ਸਥਿਤ ਜੰਗਲਾਂ ਕੋਲ ਵਾਪਰੀ। ਦੱਸਿਆ ਜਾ ਰਿਹਾ ਹੈ ਕਿ ਜਿਵੇਂ ਹੀ ਅਪਰਾਧੀਆਂ ਨੇ ਏ.ਟੀ.ਐੱਸ. ਨੂੰ ਦੇਖਿਆ ਤਾਂ ਉਨ੍ਹਾਂ ਨੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ।
ਇਸ ਘਟਨਾਕ੍ਰਮ ਵਿੱਚ ਡੀਐੱਸਪੀ ਨੀਰਜ ਕੁਮਾਰ ਦੇ ਪੇਟ ਵਿੱਚ ਗੋਲੀ ਲੱਗੀ ਅਤੇ ਐਸਆਈ ਸੋਨੂੰ ਸਾਵ ਦੀ ਲੱਤ ਵਿੱਚ ਗੋਲੀ ਲੱਗੀ। ਦੋਵਾਂ ਨੂੰ ਰਾਂਚੀ ਦੇ ਮੈਡੀਕਲ ਹਸਪਤਾਲ ਭੇਜਿਆ ਗਿਆ ਹੈ। ਦੱਸਿਆ ਗਿਆ ਕਿ ਏਟੀਐਸ ਨੂੰ ਪਤਰਾਤੂ ਥਾਣਾ ਖੇਤਰ ਵਿੱਚ ਅਮਨ ਸਾਵ ਗੈਂਗ ਦੇ ਅਪਰਾਧੀਆਂ ਦੇ ਲੁੱਕੇ ਹੋਣ ਦਾ ਟਿਕਾਣਾ ਮਿਲ ਗਿਆ ਸੀ। ਇਸ ਇਨਪੁਟ ਦੇ ਆਧਾਰ ਤੇ ਏਟੀਐਸ ਦੀ ਟੀਮ ਵੱਲੋਂ ਛਾਪੇਮਾਰੀ ਕੀਤੀ ਗਈ, ਜਦੋਂ ਉਨ੍ਹਾਂ ਨੇ ਦੋਸ਼ੀਆਂ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ ਤਾਂ ਦੋਸ਼ੀਆਂ ਨੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਪੁਲਿਸ ਟੀਮ ਵੱਲੋਂ ਮੁਲਜ਼ਮਾਂ ਨੂੰ ਫੜਨ ਲਈ ਤਲਾਸ਼ੀ ਮੁਹਿੰਮ ਚਲਾਈ ਜਾ ਰਹੀ ਹੈ।
