ਨਾ ਬਹੁਤ ਹੈਰਾਨ ਹੋਇਓ ਤੁਸੀ

ਨਾ ਬਹੁਤ ਹੈਰਾਨ ਹੋਇਓ ਤੁਸੀ ਮੇਰੇ ਇਸ ਬਿਆਨ ਉੱਤੇ

Advertisements

ਸਮੁੰਦਰ ਦਿਸ ਰਿਹਾ ਮੈਨੂੰ ਅੱਜ ਕੱਲ ਅਸਮਾਨ ਉੱਤੇ

ਕੁਦਰਤ ਦਾ ਵਰਤਾਰੇ ਵਿੱਚ ਬੜੀ ਉਥਲ ਪੁਥਲ ਵੇਖੀ

ਜਦੋ ਦੇ ਆਏ ਹਾਂ ਯਾਰੋ ਅਸੀ ਵੀ ਇਸ ਜਹਾਨ ਉੱਤੇ

ਲੋਕਾਂ ਨੇ ਹੀ ਲੋਕਾਂ ਨੂੰ ਹੈ ਏਥੇ ਡੁੱਬਦਿਆਂ ਬਚਾਇਆ

ਅਸੀ ਸ਼ੱਕ ਕਿਉਂ ਕਰੀਏ ਇਨਸਾਨ ਦੇ ਇਮਾਨ ਉੱਤੇ

ਹਿੰਦੂਆਂ ਨੂੰ ਭਰੋਸਾ ਹੈ ਜੇ ਗੀਤਾ ਤੇ ਰਮਾਇਣ ਉੱਤੇ

ਮੁਸਲਮਾਨਾਂ ਨੂੰ ਵੀ ਮਾਣ ਹੈ ਆਪਣੇ ਕੁਰਾਨ ਉੱਤੇ

ਅੰਧ ਵਿਸ਼ਵਾਸ਼ੀ ਵੱਸਦੇ ਨੇ ਤੇ ਏਥੇ ਨਾਸਤਿਕ ਵੀ ਰਹਿੰਦੇ

ਕਰੋੜਾਂ ਐਸੇ ਵੀ ਯਕੀਨ ਜੋ ਕਰਦੇ ਭਗਵਾਨ ਉੱਤੇ

ਲੱਖਾਂ ਕਰੋੜਾਂ ਲੋਕਾਂ ਨੂੰ ਜੋ ਏਥੇ ਮੂਰਖ ਬਣਾ ਗਿਆ

ਬੜਾ ਹੀ ਗੁੱਸਾ ਆਉਂਦਾ ਹੈ ਹੁਣ ਉਸ ਸ਼ੈਤਾਨ ਉੱਤੇ

ਕਦੀ ਉਹ ਕੁਛ ਕਹਿ ਦਿੰਦੇ ਕਦੀ ਉਹ ਕੁਛ ਕਹਿ ਜਾਂਦੇ

ਹੁਣ ਭਰੋਸਾ ਹੀ ਰਿਹਾ ਨਹੀ ਉੱਨਾਂ ਦੀ ਜ਼ੁਬਾਨ ਉੱਤੇ

ਉਨ੍ਹਾਂ ਦਾ ਭਲਾ ਨਹੀਂ ਹੋਣਾ ਉਹ ਭੁੱਖੇ ਵੀ ਨੇ ਮਰ ਸਕਦੇ

ਜ਼ੁਲਮ ਕੀਤਾ ਜਿੰਨਾਂ ਨੇ ਵੀ ਮੁਲਕ ਦੇ ਕਿਸਾਨ ਉੱਤੇ

ਜਦੋੰ ਤੁਸੀ ਨਸ਼ੇ ਕਰਦੇ ਸੀ ਤੁਹਾਨੂੰ ਵਰਜਿਆ ਸੀ ਬਹੁਤ

ਤੁਹਾਨੂੰ ਅਫ਼ਸੋਸ ਕਿਉੰ ਨਹੀ ਹੈ ਹੋਏ ਉਸ ਨੁਕਸਾਨ ਉੱਤੇ

ਵਰਜਿਸ਼ ਹੀ ਨਹੀ ਕੀਤੀ ਪ੍ਰਹੇਜ਼ ਵੀ ਨਾ ਕਰ ਸਕਿਆਂ

ਬਿਮਾਰ ਹੋ ਗਿਆਂ ਤਾਂ ਬਣੇਗੀ ਤੇਰੀ ਵੀ ਜਾਨ ਉੱਤੇ

ਮੇਰੇ ਨਾਲ ਵਫ਼ਾਦਾਰੀ ਕੀਤੀ ਤਾਂ ਮੈਂ ਵੀ ਵਫ਼ਾਵਾਂ ਕਰਾਂਗਾ

ਕਾਇਲ ਹਾਂ ਤੁਹਾਡੇ ਕੀਤੇ ਹੋਏ ਉਸ ਅਹਿਸਾਨ ਉੱਤੇ

ਇਹ ਜ਼ਿੰਦਗੀ ਕਈ ਰੰਗਾਂ ਦੀ ਤੂੰ ਥੋੜਾ ਵਕਤ ਕੱਢਿਆ ਕਰ

ਤੂੰ ਸਾਰਾ ਦਿਨ ਬੈਠਾ ਰਹਿਨਾ ਏੰ ਐੰਵੇੰ ਦੁਕਾਨ ਉੱਤੇ

ਮਹਿਫ਼ਲਾਂ ਵਿੱਚ ਆਉਂਦੇ ਹਾਂ ਤਾਂ ਚੰਗੀਆਂ ਗੱਲਾਂ ਹੁੰਦੀਆਂ ਹਨ

ਮਿੱਤਰੋ ਮਾਣ ਹੈ ਸਾਨੂੰ ਵੀ ਮਿੱਤਰਾਂ ਦੇ ਗਿਆਨ ਉੱਤੇ

ਬਾਦਲ ਕੈਪਟਨ ਚੰਨੀ ਨੂੰ ਹੈ ਪਰਖ ਲਿਆ ਪੰਜਾਬੀਆਂ ਨੇ

ਵਿਚਾਰੇ ਆਸ ਲਾਈ ਬੈਠੇ ਹੁਣ ਭਗਵੰਤ ਮਾਨ ਉੱਤੇ

ਸਮਾਜ ਧਰਮ ਸਿਆਸਤ ਵਿੱਚ ਬੜਾ ਕੁਝ ਗ਼ਲਤ ਮਲ਼ਤ ਹੋਇਆ

ਟੇਰਕਿਆਨੇ ਨੇ ਵੀ ਅੱਖੀਂ ਵੇਖਿਆ ਹੈ ਇਸ ਜਹਾਨ ਉੱਤੇ

ਐਡਵੋਕੇਟ ਰਘਵੀਰ ਸਿੰਘ ਟੇਰਕਿਆਨਾ,

ਜ਼ਿਲ੍ਹ ਕਚਹਿਰੀ -ਹੁਸ਼ਿਆਰਪੁਰ

ਫੋਨ : 9814173402