ਹਿਮਾਚਲ ਪ੍ਰਦੇਸ਼ ( ਦ ਸਟੈਲਰ ਨਿਊਜ਼)। ਹਿਮਾਚਲ ਪ੍ਰਦੇਸ਼ ਦੇ ਮੰਡੀ ਜ਼ਿਲ੍ਹੇ ਦੇ ਨਿਹਰੀ ਵਿੱਚ ਮੰਗਲਵਾਰ ਸਵੇਰੇ 5 ਵਜੇ ਲੈਂਡ ਸਲਾਈਡ ਕਾਰਨ ਇੱਕ ਘਰ ਢਹਿ ਗਿਆ। ਇਸ ਕਾਰਨ ਪਰਿਵਾਰ ਦੇ 3 ਲੋਕਾਂ ਦੀ ਮੌਤ ਹੋ ਗਈ, ਜਦੋਂ ਕਿ 2 ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ। ਜਾਣਕਾਰੀ ਅਨੁਸਾਰ ਨਿਹਰੀ ਦੇ ਬੋਈ ਪੰਚਾਇਤ ਦੇ ਬ੍ਰਗਟਾ ਪਿੰਡ ਵਿੱਚ ਸਵੇਰੇ ਪਹਾੜੀ ਤੋਂ ਜ਼ਮੀਨ ਖਿਸਕ ਗਈ। ਖੂਬ ਰਾਮ ਦਾ ਘਰ ਇਸਦੀ ਲਪੇਟ ਵਿੱਚ ਆ ਗਿਆ। ਘਰ ਢਹਿ ਜਾਣ ਕਾਰਨ 5 ਲੋਕ ਮਲਬੇ ਹੇਠ ਦੱਬ ਗਏ।
ਇਸ ਹਾਦਸੇ ਵਿੱਚ ਸੱਸ, ਨੂੰਹ ਅਤੇ ਪੋਤੇ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ ਜੈਸਿੰਘ ਦੀ ਪਤਨੀ ਟਾਂਗੂ ਦੇਵੀ (64), ਦੇਵਰਾਜ ਦੀ ਪਤਨੀ ਕਮਲਾ ਦੇਵੀ (33) ਅਤੇ ਦੇਵਰਾਜ ਦੇ ਪੁੱਤਰ ਭੀਮ (8) ਵਜੋਂ ਹੋਈ ਹੈ। ਖੂਬ ਰਾਮ ਅਤੇ ਦਰਸ਼ਨੂ ਦੇਵੀ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਨੇੜਲੇ ਪਿੰਡ ਵਾਸੀ ਮੌਕੇ ‘ਤੇ ਪਹੁੰਚ ਗਏ ਅਤੇ ਰਾਹਤ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਸਥਾਨਕ ਪ੍ਰਸ਼ਾਸਨ ਵੀ ਮੌਕੇ ‘ਤੇ ਪਹੁੰਚ ਗਿਆ ਹੈ। ਤਿੰਨਾਂ ਮ੍ਰਿਤਕਾਂ ਦੀਆਂ ਲਾਸ਼ਾਂ ਪੋਸਟਮਾਰਟਮ ਲਈ ਨੇੜਲੇ ਸੁੰਦਰਨਗਰ ਹਸਪਤਾਲ ਭੇਜ ਦਿੱਤੀਆਂ ਗਈਆਂ ਹਨ।
