ਹੁਸ਼ਿਆਰਪੁਰ (ਦ ਸਟੈਲਰ ਨਿਊਜ਼)। ਤਿਉਹਾਰੀ ਸੀਜਨ ਵਿੱਚ ਲੋਕਾਂ ਨੂੰ ਸਾਫ-ਸੁਥਰਾ ਤੇ ਮਿਆਰੀ ਖਾਦ ਪਦਾਰਥ ਮੁਹਈਆ ਕਰਵਾਉਣ ਅਤੇ ਮਿਲਾਵਟ ਖੋਰਾਂ ਤੇ ਸ਼ਿਕੰਜਾ ਕੱਸਣ ਤੇ ਫੂਡ ਕਮਿਸ਼ਨਰ ਪੰਜਾਬ ਦੀਆਂ ਹਦਾਇਤਾਂ ਮੁਤਾਬਿਕ ਦੁੱਧ, ਪਨੀਰ, ਪਾਣੀ, ਕੋਲਡ ਡ੍ਰਿਨਕ, ਮਸਾਲੇ ਆਦਿ ਦੇ ਸੈਂਪਲ ਮੌਕੇ ਤੇ ਲੈ ਕੇ ਉਸੇ ਵਕਤ ਨਤੀਜਾ ਦੇਣ ਲਈ ਮੁਬਾਇਲ ਫੂਡ ਟੈਸਟਿੰਗ ਵੈਨ ਨੂੰ ਅੱਜ ਦਫਤਰ ਸਿਵਲ ਸਰਜਨ ਡਾ. ਜਸਬੀਰ ਸਿੰਘ ਵੱਲੋ ਹਰੀ ਝੰਡੀ ਦੇ ਕੇ ਫੀਲਡ ਲਈ ਰਵਾਨਾ ਕੀਤਾ ਗਿਆ । ਇਹ ਟੈਸਟਿੰਗ ਵੈਨ 31 ਅਕਤੂਬਰ ਤੱਕ ਜਿਲੇ ਦੇ ਵੱਖ-ਵੱਖ ਕਸਬਿਆ ਵਿੱਚ ਜਾ ਕੇ ਖਾਣ ਵਾਲੇ ਪਦਾਰਥ ਜਿਵੇਂ ਦੁੱਧ, ਪਨੀਰ ਆਦਿ ਦਾ ਸੈਂਪਲ ਲੈ ਕੇ ਮੌਕੇ ਤੇ ਰਿਪੋਟ ਦੇਵੇਗੀ ।
ਹੋਰ ਜਾਣਕਾਰੀ ਦਿੰਦੇ ਹੋਏ ਸਿਵਲ ਸਰਜਨ ਨੇ ਦੱਸਿਆ ਕਿ ਆਮ ਤੋਕ ਤੋ ਲੋਕਾਂ ਨੂੰ ਇਹ ਸ਼ਿਕਾਇਤ ਰਹਿੰਦੀ ਹੈ ਕਿ ਵਿਭਾਗ ਵੱਲੋਂ ਸੈਂਪਲ ਤਾਂ ਲੈ ਲਏ ਗਏ ਹਨ ਪਰ ਇਸ ਦੀ ਰਿਪੋਟ ਤਾਂ ਉਹਨਾਂ ਨੂੰ ਬਹੁਤ ਦੇਰ ਬਾਅਦ ਮਿਲਦੀ ਹੈ । ਇਸ ਮੌਕੇ ਤੇ ਜਿਲਾ ਸਿਹਤ ਅਫਸਰ ਸੁਰਿੰਦਰ ਸਿੰਘ ਨੇ ਦੱਸਿਆ ਕਿ ਮੁਕੇਰੀਆਂ, ਤਲਵਾੜਾ ਤੇ ਹਾਜੀਪੁਰ ਖੇਤਰਾਂ ਵਿੱਚ ਮਿਲਵਾਟੀ ਪਦਾਰਥਾਂ ਦੀ ਵਿਕਰੀ ਬਾਰੇ ਪਤਾ ਲੱਗਣ ਤੇ ਵਿਭਾਗ ਵੱਲੋ ਇਹ ਮੋਬਾਇਲ ਟੈਸਟਿੰਗ ਵੈਨ ਇਹਨਾਂ ਖੇਤਰਾਂ ਵਿੱਚ ਭੇਜੀ ਜਾ ਰਹੀ ਹੈ ਤਾਂ ਜੋ ਲੋਕ ਮੌਕੇ ਤੇ ਮਿਲਾਵਟੀ ਪਦਾਰਥਾਂ ਬਾਰੇ ਜਾਂਚ ਕਰਵਾ ਸਕਣ।
ਉਹਨਾਂ ਕਿਹਾ ਕਿ ਇਸ ਫੂਡ ਸੇਫਟੀ ਟੀਮ ਵੱਲੋ ਸਮੇਂ ਸਮੇਂ ਸਿਰ ਛਾਪੇ ਮਾਰੀ ਕਰਕੇ ਮਿਲਾਵਟ ਖੋਰਾਂ ਤੇ ਨਕੇਲ ਪਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਉਹਨਾਂ ਵੱਲੋ ਜੇਕਰ ਕੋਈ ਇਸ ਸਬੰਧੀ ਸ਼ਿਕਾਇਤ ਮਿਲਦੀ ਹੈ ਤਾਂ ਵਿਭਾਗ ਵਲੋਂ ਫੂਡ ਸੇਫਟੀ ਐਕਟ ਦੇ ਤਹਿਤ ਸਖਤ ਕਾਰਵਾਈ ਕੀਤੀ ਜਾਵੇਗੀ ।
