ਕਪੂਰਥਲਾ (ਦ ਸਟੈਲਰ ਨਿਊਜ਼), ਰਿਪੋਰਟ-ਗੌਰਵ ਮੜੀਆ। ਪਾਕਿਸਤਾਨ ਵੱਲੋਂ ਬੀਤੀ 9 ਅਤੇ 10 ਮਈ ਦੀ ਰਾਤ ਨੂੰ ਵੀ ਪੰਜਾਬ ਦੀਆਂ ਕਈ ਥਾਵਾਂ ਨੂੰ ਡਰੋਨਾਂ ਨਾਲ ਨਿਸ਼ਾਨਾ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਜਿਸ ਨੂੰ ਪਹਿਲਾਂ ਦੀ ਤਰਾਂ ਭਾਰਤੀ ਫੌਜਾਂ ਨੇ ਬਹੁਤ ਹੀ ਚੌਕੰਨੇ ਰਹਿੰਦੇ ਹੋਏ ਅਸਫਲ ਬਣਾ ਦਿੱਤਾ।
ਅੱਜ ਸਵੇਰੇ ਨੇੜਲੇ ਪਿੰਡ ਧਾਲੀਵਾਲ ਬੇਟ ਦੇ ਖੇਤਾਂ ਵਿੱਚ ਮਿਜ਼ਾਇਲ ਦੇ ਟੁਕੜੇ ਮਿਲਣ ਦੀ ਸੂਚਨਾ ਮਿਲੀ ਹੈ।ਪਿੰਡ ਦੇ ਸਾਬਕਾ ਸਰਪੰਚ ਯੁੱਧਵੀਰ ਸਿੰਘ ਰਾਣਾ ਨੇ ਦੱਸਿਆ ਕਿ ਰਾਤ ਕਰੀਬ ਡੇਢ ਵਜੇ ਇਕ ਧਮਾਕੇ ਦੀ ਅਵਾਜ਼ ਪਿੰਡ ਦੇ ਲੋਕਾਂ ਨੇ ਸੁਣੀ ਜਿਸ ਨੂੰ ਸਵੇਰੇ ਜਾ ਕੇ ਮੰਡ ਇਲਾਕੇ ਵਿੱਚ ਵੇਖਿਆ ਕਿ ਮਿਜ਼ਾਈਲ ਦਾ ਇਕ ਟੁਕੜਾ ਡਿੱਗਾ ਪਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਨਾਲ ਜਾਨੀ ਨੁਕਸਾਨ ਤਾਂ ਨਹੀਂ ਹੋਇਆ ਪਰ ਲੋਕਾਂ ਵਿੱਚ ਦਹਿਸ਼ਤ ਤੇ ਸਹਿਮ ਦਾ ਮਾਹੌਲ ਬਣ ਗਿਆ। ਉਨ੍ਹਾਂ ਦੱਸਿਆ ਕਿ ਇਸ ਸਬੰਧੀ ਤੁਰੰਤ ਢਿਲਵਾਂ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਜਿਸ ‘ਤੇ ਥਾਣਾ ਮੁਖੀ ਇੰਸ: ਮਨਜੀਤ ਸਿੰਘ ਮੌਕੇ ‘ਤੇ ਪਹੁੰਚੇ। ਇਸੇ ਤਰ੍ਹਾਂ ਪਿੰਡ ਸੰਗਰਾਵਾਂ, ਮਾਂਗੇਵਾਲ, ਮਨਸੂਰਵਾਲ ਬੇਟ ਅਤੇ ਪਿੰਡ ਨੂਰਪੁਰ ਲੁਬਾਣਾ ਵਿਖੇ ਵੀ ਮਿਜ਼ਾਇਲ ਅਤੇ ਡਰੋਨ ਵਰਗੇ ਉਪਕਰਣਾਂ ਦੇ ਟੁਕੜੇ ਮਿਲਣ ਦੀ ਸੂਚਨਾ ਹੈ।
